DUMBRÍA Calidade Turística en Destinos (SICTED)

A Oficina de Turismo do Ézaro é distinguida polo Sistema Integral de Calidade Turística en Destinos (SICTED)

O ano pasado, 2023, implantouse na Costa da Morte o Sistema Integral de Calidade Turística en Destino SICTED, grazas ao cofinanciamento da Deputación da Coruña, a través das axudas aos entes de xestión turística da provincia, e á Costa da Morte Asociación Turística CMAT.

O SICTED é un proxecto da Secretaría de Estado de Turismo (SETUR), que conta cunha metodoloxía propia baseada nunha visión global de destino, que contribúe a implantar un sistema de xestión da calidade nos destinos turísticos.

Esta metodoloxía conta con varios ciclos de implantación e cada ciclo require do cumprimento de determinados requirimentos: formación, plataforma tecnolóxica, asesoramento individualizado, documentación, plans de mellora, obradoiros colectivos,…

Tras ter rematado o Ciclo 1, e polo tanto pasar ao Ciclo 2, a Oficina de Turismo do Ézaro (Dumbría) recibiu o seu diploma e o distintivo de Compromiso de Calidade Turística, que a acredita e recoñece o seu esforzo e compromiso coa calidade e a mellora continua.