As festas funcionan como marcadores do tempo cíclico, son fitos importantes no calendario. Hai festas do ciclo anual, patronais, romarías e, nos últimos tempos, aparecen tamén festas con outras motivacións.

No concello de Dumbría cada parroquia ten a súa festa patronal, como tamén teñen ou tiñan outras festas locais secundarias. Estas, ás veces, poderían ter máis relevancia que a propia festividade do patrón, por celebrarse no verán ou por outros motivos, como ocorre coas festas do Carme na parroquia de Dumbría, que ten maior atracción que as propias patronais.

Despois estarían as romarías da Virxe das Neves, na Fonte Santa, e a de Santa Lucía, en Olveiroa. Estas tiñan unha importancia que trascendía os límites da parroquia e mesmo do concello.

Nos últimos tempos destacan novas festas que responden a unha nova concepción de tempo festivo. Así hai que sinalar a Festa da Praia, que cada verán se celebra ao carón da praia do Ézaro e na que o principal atractivo está nas concorridas competicións deportivas e nas actuacións musicais.