O camiño de Santiago é unha rota de peregrinación até a tumba do Apóstolo.

Historicamente moitos peregrinos, unha vez chegados a Compostela, proseguían unhas xornadas máis até Fisterra ou Muxía, atraídos, entre outros motivos, polo desexo de ver o mar, desexo que debía ser grande especialmente nos que viñan dende lugares de Europa central e que nunca viran nin volverían ver a inmensidade do Océano.

Esta visión estaba reforzada pola idea da fin do mundo. Na actualidade son milleiros os peregrinos que seguen atraídos polo camiño de Fisterra ou Muxía.

O camiño actual atravesa as terras de Dumbría e aquí está a bifurcación para que o peregrino opte por ir primeiro a Fisterra ou a Muxía.

Para atender a demanda dos peregrinos abriuse en 2001 un albergue na aldea de Olveiroa, recuperándose varios edificios xa existentes e está proxectado outro na localidade de Dumbría, na variante a Muxía.

O camiño entra nas terras de Dumbría por Ponte Olveira cando o peregrino realiza o último tramo da segunda etapa desta Prolongación Xacobea, a de Negreira a Olveiroa. Nesta localidade descansará desta longa etapa (35 km) no albergue de peregrinos. A imaxe de peregrinos sentados na porta do albergue ou no bar é algo xa habitual dende hai uns anos.

A etapa seguinte empeza en Olveiroa e sube polo monte Sino, deixando á esquerda o río Xallas que baixa aquí encaixado. Despois o itinerario segue por Logoso e Hospital cara onde está a factoría de Ferroatlántica. Aquí bifúrcase e o peregrino debe optar por ir á esquerda cara a Fisterra ou seguir de fronte cara a Muxía.

Cara a Fisterra o camiño vai polo alto dos montes de Buxantes e pasa ao pé do petroglifo de Pedra Ancha, polo cruceiro de Marco do Couto e polo santuario da Virxe das Neves, para deixar Dumbría camiño da capela de San Pedro Martir no veciño concello de Cee.

O camiño cara a Muxía baixa cara a capital do concello, cruza o seu núcleo urbano e deixa Dumbría camiño do santuario da Virxe de Aránzazu, en Trasufre (Muxía).